“Whakapapaina te kupenga
Kia kaha roa tana puta”

Ko tēnei whakatauki he whakatauki e hāngai tonu ki te rōpū Ngā Rangahautira, me ngā mahi kei te whakahaerehia e mātou. Ko te tikanga o taua kōrero, he kōrero mō te noho ngātahi me te mahi ngātahi o tērā, o tērā, kia puta kaha roa ngā hua. Mō mātou o Ngā Rangahautira he whakarite wāhi, whakarite kaupapa hoki kia tuitui i ngā tauira ki ngā kaupapa ā whānau, kaupapa Māori kei te Kura ā Ture, tuatahi. Tuarua, he āta honohono i ngā tauira pakeke ki ngā tauira hou kia mate ururoa ki ēnei mahi, kia whai hua, kia kaha roa hoki i roto i ngā tikanga o te ture. Tuatoru, he whakarite kaupapa toi, kaupapa whakangahau kia piki ake te mauri tū, te mauri ora ki roto i ngā tauira Māori. Anō nei, he māngai hoki te rōpū mō ngā tauira Māori e ako ana i te ture.

I ngā paepae ture o te motu, kua whai hua ngā tauira o Ngā Rangahautira. Ko ngā whakataetae kōti ā-motu, te whakataetae māro, ki waenga i ngā whare wānanga o te motu. He whakataetae āta wetewete i te hiranga o te tikanga Māori me te ture Pākehā i roto i te kēhi kotahi. Ka tū te tangata i mua i ngā kaiwhakawā o te Kōti Whenua Māori ki te tuku i ngā tono pēnei ki te rōia. Ā, mā ngā kaiwhakawā anō e whakatau ko wai te tauira toa ki te wetewete i ngā kaupapa me te whakatakoto i aua kōrero i mua i te kōti. I ngā tau whā kua pahure, tokotoru ngā wā kua eke panuku, kua eke hohoro ngā tauira o Ngā Rangahautira ki te kōmata o tēnei whakataetae. I tēnei tau ka tū anō a Ngā Rangahautira ki ngā whakataetae nei. Ko te tumanako kia kake anō ki te angitū o ēnei mahi.

Te Kōmiti Whakahaere o Ngā Rangahautira:

Tūmuaki Wahine: Phoebe Monk
Tumuaki Tane: David Jones
Hēkeretari: Erin Carr
Kaitiaki Pūtea: Piri Norris
Māngai mō ngā tau tuatahi: Stony Tata & Kimiora Tamatea
Māngai mō ngā tau tuarua: Quinn Rosa & Lily Beechen
Māngai mō ngā tau tuatoru: Echo Haronga & Kat Wickliffe