“Pinepine te kura ,hau te kura

Whanake te kura I raro I Awarua

Ko te kura nui, ko te kura roa,

Ko te kura o tawhiti nā Tu-hae-po                                     

Tenei te tira hou, tenei haramai nei;

Ko Te Umu-rangi, na Te Whatu-i-apiti

Nau mai, e tama, ki te taiao nei

Ki whakangungu a koe ki te kahikatoa,

Ki te tumatakuru, ki te taongaonga;

Nga tairo e nahau, e Kupe

I waiho I te ao nei.”

He moteatea tēnei kua whakatinana i tōku nei titiro ki te ao, mai i te titiro a tōku nei iwi o Ngāti Kahungunu. Ka tū whakahihi ana au i runga i te tihi, i te pito o tōku maunga a Otatara, ka titiro whakamua ki Te Whanaui-A-Orotu. Ka puta te whakaaro ko wai au i te iwi Māori, ko wai  au i te iwi Pākehā? I te ao e noho nei au, ka rere ōku toto i ngā wai mārino o tōku awa a Tūtaekurī, ka teretere tōku tuakiri i ngā piko o Otatara rā. I te ao Pākehā ka tahuri ōku whakaaro ki ngā pukapuka a te whare wananga, ka rongo ōku taringa ki ngā tini reo mātauranga e karawhiua mai ana e ōku kaiako.

Kei tēnā tangata tōna kanohi, kei tēnā tangata tōna kōrero tāhūhū

Ko te kanohi o te tangata  he ōrite ki te whakaahuatanga o tētahi whakairo. Ko te kanohi tonute whakairo. He moko kāore i āta tākia e te kaitā, he moko tākia e te ngākau.

He tātai whakapapa ki te whenua, he tātai whakapapa ki ngā tīpuna o nehe rā

He hītori e whātoro atu ana ki Hawaiki nui, ki Hawaiki roa, ki Hawaiki pamamao

Ko te hinengaro te kaipupuri i tō mōhio ki te ao: kete tuauri, kete tuatea,  kete āronui.

Kei te mata tōna reo e whakakupu ana i taua mōhio ki te ao.

Ka tū whererei ngā poupou i roto i te wharenui o Te Tumu Herenga Waka.  He kanohi ēnei tipua whakairo hei whakatauira atu ki te marea kei hea te taumata hei whai, mai i te wā e kuhu atu ana ki tōna poho, tae atu anō ki te wā ka wehe atu ka whakapōtaehia ana. Inā rā te kōrero, “E tū, e hine, e tama mā whakaarahia ake ngā poupou o tō whare o Te Herenga Waka.” Me whakarangatira ēnei pou, ngā kanohi nei o aua matua tīpuna ko mātou hei pokohiwi mā rātou.Ka pā te waewae ki te papa o tēnei whare tapu, kua tangata whenua koe. Kua herea tō waka ki tōna tauranga, kua pae ki uta.